Est-ce qui le kaa’ba c’est ene idole pour les musulmans ?
Question :
Est-ce qui li vrai qui l’idolâtrie li pareille couma la prière du musulman cote Ka’bah ?
Réponse :
Non, li pas vrai :
- L’idolâtre li prié ene idole qui li considère comme so divinité. Le musulman li pas prié Ka’bah, mais li prié le Créateur cote Ka’bah.
- L’idolâtre li prié ene idole qui dans forme de so divinité. Le musulman li prié Allaah qui pas capave représente Li par aucun forme, devant Ka’bah qui considéré comme ene mosquée, comme ene la caze Allaah.
- L’idolâtre li prié so idole n’importe cotesa li été jusqu’à li donne li ene petit lacaze dans so la cour, li charié li avec li dans so l’auto et li trace ene ti-place pour li lor la plage publique. Les musulmans entier le monde, quand nous faire la prière n’importe cotesa, jamais nous mettre ene petit Ka’bah devant nous, mais Ka’bah li juste dans ene seul place dans le monde, comme ene direction qui rassemblé bans musulmans de tous coins de sa le monde-là.
- L’idolâtre, devant so idole, li ressenti qui li devant so Bondieu. Le musulman, devant Ka’bah, jamais li ressenti qui li devant so Créateur ; au contraire, le musulman fine être enseigné qui n’importe cotesa li pe faire la prière, li bizin ressenti qui le Créateur qui au-dessus de bans les ciels, Li pe trouve li et li pe entendre li.
- L’idolâtre, devant so idole, li ressenti qui li devant ene quitechose puissant. Le musulman, devant Ka’bah, li ressenti qui li devant ene monument qui pas possède aucun pouvoir.
- L’idolâtre, quand li vine prier so idole, li apporte bans offrandes avec li pour offert à so Bondieu, qui li soit banane ou coco ou du lait. Le musulman, quand li vine devant Ka’bah, li pas apporte aucun offrande avec li.
En bref, nous capave résume croyance d’ene musulman lor Ka’bah, par la paole du deuxième calife de l’Islaam, Umar Ibnul Khattwaab, quand li ti dire à la pierre noire qui trouve dans Ka’bah :
إِنِّي أَعْلَمُ أَنَّكَ حَجَرٌ لَا تَضُرُّ وَلَا تَنْفَعُ وَلَوْلَا أَنِّي رَأَيْتُ النَّبِيَّ صَلَّى اللَّهُ عَلَيْهِ وَسَلَّمَ يُقَبِّلُكَ مَا قَبَّلْتُكَ
Mo conné qui to ene roche, to pas faire moi ni du tort et ni du bien. Si mo pas ti trouve le prophète d’Allaah embrasse toi, mo pas ti pour embrasse toi.
(BUKHARI 1494)
